في يوم من الأيام كنت من احدى ساكني الالا لاند
و كنت عايشة راضية، مبسوطة و سعيدة جداَ و الله ... بدأت الاحظ اني مختلفة عن
اللي حواليا و اللي زيي مش كتير و ان ساكني الالا لاند بيتم معاملتهم معاملة مش
ولابد، لامؤاخذة ( معاملة اطفال ) و ده ليه؟
ببساطة لان ساكني الالا لاند لما تكون بتتكلم
معاهم في موضوع ما وتدخلهم في تفاصيل كتيرة طويلة ومش مهمة بتلاقيهم فصلوا منك خالص
و بتجيلهم حالة اسمها ال( details phobia )
فوبيا التفاصيل، على طول بتشتغل في ودانهم
أغنية ( La Vie en Rose) وبتطلعلهم جناحات و بيطيروا
في سماء الالا لاند مع العصافير و السما الزرقا حواليهم في كل مكان و من تحتهم البحر
و ده في نفس ذات اللحظة اللي انت ماسك فيها ودانهم و عمال تلت و تعجن في نفس
الموضوع ... هما ظاهرياً باصينلك و عينهم في عينك و لكن فعلياً هما في مكان تاني
أحلى بكتير. المشكلة هنا ايه؟
لما
تحب تراجع مع مواطن لالا لاندي المنهج و تقوله: فاكر الموضوع الفلاني اللي
حكيتهولك من 5 دقايق ؟، تلاقيه قلب أمه في عينيه علامات استفهام و طبعا مش فاكر أي
حاجة لانه كان بيتفسح و انت بتحكي و يقولك ايوه ايوه لما كنت ا........ و بعدين
ا....... وهنا بيعتمد المواطن الالا لاندي على انك بتكمل النقط بس المهم انه يحاول
يحافظ على هويته السرية و ميتكشفش و متعرفش انه من الالا لاند بس للاسف بعد كام
موقف من دول بنتعرف و تبدأ الناس تتهامس من حولك و يفضل الكلام يتنقل بين الناس و
بعضها لحد ما تقابل حد يقولهالك في وشك " يا عم ... انت في الالا لاند
".
و الحقيقة بعد ما الناس عرفت اني من الالا
لاند، اخدت قرار اني اسيب الالا لاند خالص و اخرج لل ( Real land) ... خدوني معاكم 👀 و في ليلة حزينة
ممطرة وضبت اغراضي و جمعت اشيائي الحبيباتي و حزمت حقائبي وودعت الالا لاند
وبالفعل خرجت من الارض الفاضلة تاركة ورائي القليل من البشر الالا لانديين السعداء
الحالمين، على امل اني اكون أكثر واقعية و اهتمام ووعي بكل الأشياء و اني اكون
ملمة بمواعيد و التزامات و ارقام و مناسبات و افراح و احزان البشر اللي انا عايشة
معاهم و اللي مش عايشة معاهم، و لأول مرة اركز تماما في كل تفاصيل موضوع احدى الصديقات؛
كل تفصيلة حرفياً عشان لما تحب تراجع معايا الموضوع ... اجاوب صح، بس هو دايماً
حظي كده من زمان الدرس اللي بذاكره مبيجيش منه في الامتحان و مسألتنيش في الموضوع
ده و فضلت محتفظة بكل التفاصيل، و تفاصيلي مع تفاصيلها مع تفاصيل الجيران شكلت
عقدة؛ و عقدة مع عقدة الموضوع كلكع مني خالص و مش عارفة أفك ازاي ... ما انا سيبت
الالا لاند خلاص.
و بالفعل اصبحت بحتفظ بكل التفاصيل (الصغيرة
و الكبيرة ) و الالتزامات ( العاجلة و المؤجلة ) و كل المواعيد ( المهمة و المش
مهمة ) و كل الأرقام ( الصغيرة و الكبيرة ) و كل المناسبات ( السعيدة و الجزينة ) وفي
الفترة دي كنت مضغوطة و عصبية و مجهدة و لما بنام بكمل تفكير في كل الاحداث و
براجع التفاصيل المختزنة بداخلي، لحد اما النور قطع!
لكن لما رجع تاني، السيستم هنج و سقطت كل حاجة، مهو مش
طبيعي تفضل مركز طول الوقت في كل حاجة! أو يمكن في ناس بتعرف تعمل كده ... بسم الله ما شاء الله والحمد لله اني مش منهم، لانه اكيد بيكون على حساب حاجات تانية، يعني مثلاً عندي واحدة صاحبتي كانت فاكرة
بلوزة انا كنت لابسها من سبع سنين لكن ناسية حاجات مهمة اخدتها في كورس ... خزنت
البلوزة بتاعتي في ذاكرتها ونسيت معلومات دفعت فيها فلوس و تعبت وامتحنت فيها!
ما علينا، و زي ما توقعتم كده بالظبط ...
قررت ارجع تاني الالا لاند، و الجميل في الالا لاند انها دايماً فاتحة ابوابها لكل
الناس في اي وقت و من غير ما تكلف نفسك أي حاجة... كل اللي عليك تعمله انك تاخد القرار
و بس؛ تاخد قرار انك تشيل الفيشة و تفصل و تبطل تركز في كل التفاصيل .. ركز في
المهم وبس و لو انت شخص مستاء من صديقك اللي عايش في الالا لاند ... فنصيحة: *ركز في الحديث معاه على اهم الأنباء و بلاش استرسال في تفاصيل كتيرة مش مفيدة، بننام منكم و الله و خلي
الحديث متبادل هات و خد عشان تحافظ على تركيزه معاك، بلاش تمسك المايك لوحدك.
اما بالنسبة لنا معشر الالا لانديين فلا تسعى
لتغيير هويتك و خليك صريح و انت بتعرف نفسك، قولهم من الأول " انا بلح".
الالا لاند للناس الباقيه علي صحتها زينا💪💃😂
ردحذفبالظبط ... هو ده الكلام
حذفاهلا بكى فى الالا لاند :-)
ردحذفاهلا وسهلا
حذف