إمبارح كان عندي عشر دقايق فاضيين .. قلت
أقعد مع نفسي شوية .. نفضفض مع بعض كده و نحكي .. من زمان مقعدتش معاها، والحقيقة
لاقيتها معبية و شايلة كتييييير ..
قولتلها مالك يا سوسن ؟
_قالتلي: مفيش.
*إخلصي يا حجة و الله ما عندي وقت .
_كمان .. معندكيش وقت تقعدي مع نفسك شوية ..
ده إيه الجحود ده!
*اعمل ايه .. شغل البيت و العيال و شغل البيت و التمارين و
شغل البيت و الطبيخ و شغل البيت والغسيل و شغل البيت و الأكل و......
_إيه هو ده .. هو شغل البيت مبيخلصش!
*اه و الله ما بيخلص.
_ما هي دي المشكلة .. إنك بتعملي كل الحاجات
دي و بتنسيني.
*أنساك ده كلام .. معقولة يعني أنساكي ازاي
بس .. ده أنتي و الله حرفيا في قلبي.
_طبيعي اني اكون في قلبك و بجري في دمك كمان
... ما انا نفسك يا هبلة... ورغم كده، مسألتنيش بقالك فترة :
هو انتي مبسوطة و لا لأ؟
و لو مش مبسوطة .. ايه اللي يفرحك؟
طب نفسك في ايه ؟ و حاجة غير الأكل لأن الأكل
ده انتي اللي نفسك فيه يا طفسة .. أنا بهيص معاكي شوية بس لما بتاكلي من بره و لا
تضربي حاجة حلوة لكن مش دي الحاجة اللي تبسطني..
بقالك كتييييير مشجعتنيش و قولتيلي "
انتي قوية .. انتي شاطرة .. انتي قد المسئولية .. انتي ذكية .. انتي جميلة .. انتي
اقوى من أي حاجة .. انتي ماي هيرو.. انتي الست السوبر اللي مفيش حاجة تقدر تقهرها
.
انتي عارفة انتي عملتي فيا ايه؟
* بنبرة مُذنب " عملت ايه؟"
_ بصي في المراية و انتي تعرفي.
و قتها لما بصيت في المراية مشوفتش الصورة
اللي كنت بشوفها كل يوم و هي شكلي الخارجي ( التابلوه) .. لأ بصيت و ركزت شوية
شوفت نفسي من جوه.. بس مش زي ما كنت بشوفها قبل كده خالص .. بالعكس شوفت صورة حزينة .. مكسورة .. شوفت
صورة مهزوزة مش واضحة .. صورة مش عارفة احدد حتى ملامحها .. شوفت اللحظة اللي
اهملت فيها الانسانة دي و عملت فيها اسوء حاجة ممكن اي حد يعملها في نفسه عملتلها
( تعويم)،
غريبة مش كده ِ!
اه عملتلها ( تعويم ) يوم لما بطلت ادعمها و
اقف في ضهرها و اسيب تقديرها حسب سعر السوق.. انهاردة متقدرة .. و بكرة متكدرة،
وعملتلها ( تهميش ) يوم لما قررت اني اخليها اخر أولوياتي و اللي غالباَ مبيكونش
ليها أي وقت عشان احس أواهتم بيها .. و
عملتلها ( احباط ) لما في وقت كانت ضعيفة و محتاجة اني ادعمها و خذلتها و سيبتها
مجروحة .. وعملتلها ( دمور ) لما بطلت ازكيها و اطورها و أرفع قدرها و أعليها ..
كسرتها و خذلتها .. و جرحها كان طول الوقت بينزف جوايا، حاسة بيه و مش عارفة أداويه
و مش عارفة ايه سبب للي انا فيه .. اعراض كتيرة ظاهرة عليا و مش قادرة احط ايدي
على السبب: خنقة، ضيقة، انكسار، شرود، احباط، حزن، زهق و الأدهى من كل ده اني وصلت
لمرحلة تبلد ولامبالاة .. كنت فاكرة ان اللامبالاة هي الحل .. لما ابطل احس هكون
احسن، لما افقد الاحساس هبطل وجع .. هو مين عاقل قال كده؟
احب اقول للعاقل اللي قال " اللامبالاة
هي الحل" .. ابقه اتأكد يا بابا في المرة الجاية اللي تحب تمارس فيها
اللامبالاة؛ انك بتمارسها صح لاني اكتشفت اني لما مارست اللامبلاة كنت بمارسها مع
نفسي مش مع الناس، بطلت اسمع صوتي الداخلي و تجاهلته لحد ما السنسور( SENSOR ) باظ
و أدي النتيجة .. طلعت على دماغي في الاخر و بقيت نكدية وانا مش حاسة و فهمت غلطي
و اتعلمت اني ابطل اتجاهل رغبتي الداخلية في اني اكرس جزء من و قتي لنفسي؛ اقعد
معاها و اسمعها و اهتم باحتياجتها و ادلعها زي ما بدلع اي حد .. و بدأت اصالح نفسي
و احايل فيها و اوعدها اني مش هعمل كده تاني، واذ فجأة ديك النهار صحصح و طار والعشر
دقايق اللي كنت فاضية فيهم خلصوا بسرعة بس ساعتها قررت اني اخليهم عشرين دقيقة ..
( يلا محدش واخد منها حاجة ) اه عشرين و ربنا .. امال انتوا مفكرين ايه؟ اصلي لازم
ازودهم كده واحدة واحدة عشان اتقطمت جامد الصراحة و ان شاء الله عندي طموح ان مع
الوقت يكبروا كده و يوصلوا تلاتين دقيقة .. الله المستعان .. المهم اني مش ههمل
نفسي تاني و هحاول اعالج البنت يمكن ترجع تاني زي الأول ... دعواتكم معايا😃
جميل جدا 💝
ردحذف